Ein gwasanaeth i gwsmeriaid

Byddwn bob amser yn ceisio:

• ymchwilio’n deg a gwrando ar y ddwy ochr
• rhoi ein hateb i chi mor gyflym â phosibl
• esbonio pethau’n eglur a gadael i chi wybod lle ’ydych yn sefyll
• cwrdd â’ch anghenion cyfathrebu a hygyrchedd

Ein nod yw cadw safon uchel o ansawdd ynghylch sut rydym yn trafod cwynion. Mae ein hymchwilwyr yn gweithio’n agos â’n hombwdsmyn, sy’n eu cefnogi â gwybodaeth a phrofiad arbenigol o ddod o hyd i atebion teg i gwynion. Ac mae ein hombwdsmyn yn gweithio gyda’i gilydd mewn grwpiau arfer proffesiynol i sicrhau eu bod yn gyson yn eu syniadau a dull.

Mae ein rheolwyr ac ombwdsmyn yn sicrhau ansawdd dydd i ddydd ein gwaith achos. Maent yn adolygu ein cyswllt â chwsmeriaid a busnesau i sicrhau ein bod wedi: 

• gwrando a gofalu
• mynd i’r afael â’r materion a defnyddio synnwyr cyffredin
• bod yn eglur a gonest

Rydym yn defnyddio’r gwiriadau hyn i roi adborth i’n timau gwaith achos, ac i fesur pa mor dda rydym yn perfformio fel gwasanaeth. Rydym hefyd yn cynnal adolygiadau chwarterol o’n gwaith achos, gan nodi materion a thueddiadau sy’n ailddigwydd fel ein bod yn gallu dysgu a gwella.

Rydym yn gwybod pa mor bwysig yw dysgu o ble mae pethau wedi mynd o’u lle. Ac rydym yn dymuno gwneud hyn ar gyfer ein gwasanaeth hefyd, fel ein bod yn gallu gwella’r hyn a wnawn yn y dyfodol. Dyna pam mae gennym ein gweithdrefn ein hunain ar gyfer edrych ar gwynion am ein gwasnaeth i gwsmeriaid.  

Os byddwch yn cwyno wrthym am y gwasanaeth rydym wedi’i roi i chi, byddwn yn gyntaf yn ceisio datrys y broblem ein hunain. Ond os na fyddwn yn gallu, mae gennym aseswr annibynnol a fydd yn adolygu’r gŵyn yn ddiduedd ac yn argymell yr hyn sydd angen i ni ei wneud i gywiro pethau.

Bydd ein haseswr annibynnol yn cyflwyno adroddiad blynyddol am y cwynion maent yn eu derbyn i’n gweithrediaeth a bwrdd.

Dysgwch sut i gwyno am ein gwasanaeth i gwsmeriaid.

Gwrthdaro buddiannau yw pan fydd barn neu gamau gweithredu rhywun yn y gwaith yn, neu’n gallu, cael eu heffeithio gan rywbeth nad yw’n gysylltiedig â’u rôl.

Ein gwaith yw bod yn annibynnol a diduedd, felly rydym yn cymryd camau gweithredol i sicrhau na fydd gwrthdaro buddiannau’n codi. 

Rydym yn disgwyl i’n holl staff ddweud wrthym cyn gynted ag y byddant yn ymwybodol o unrhyw amgylchiadau a allai godi, neu a ystyrir a fydd yn codi, i wrthdaro buddiannau. Os bydd aelod o staff yn trafod cwyn lle ceir gwrthdaro buddiannau posibl, byddwn yn trosglwyddo’r gŵyn i rywun arall yn syth. Rydym yn nodi ein dull mewn mwy o fanylder yn ein polisi gwrthdaro buddiannau.

Rydym yn cydnabod y gall materion ynghylch cwynion fod yn llawn straen ac annifyr - ond mae ein staff bob amser yn haeddu cael eu trin â chwrteisi a pharch. Ni fyddwn yn caniatáu ymddygiad treisgar, amharchus na bygythiol tuag at ein staff. Os bydd hyn yn digwydd, mae’n bosibl y byddwn yn penderfynu cymryd camau gweithredu ychwanegol.  Dysgwch fwy am yr hyn rydym yn ei ystyried fel ymddygiad afresymol a’r camau gweithredu y gallem eu cymryd ar ein polisi ymddygiad afresymol.